Хүнс, хөдөө аж ахуй, хөнгөн үйлдвэрийн яам, төрийн байгууллагууд болон салбарын мэргэжлийн холбоод, хувийн хэвшил, банк санхүү, олон улсын байгууллагын төлөөллийг оролцуулсан Хөдөө аж ахуйн ерөнхий хуулийн төслийн анхны танилцуулга, хэлэлцүүлэг боллоо.
Хүнс, хөдөө аж ахуй, хөнгөн үйлдвэрийн яамны захиалгаар Хөдөө аж ахуйн ерөнхий хуулийн төслийг Хөдөө аж ахуйн бүсийн тухай хуулийн төсөлтэй нэгтгэн боловсруулах ажлыг ММХ зөвлөх үйлчилгээний баг 2024 онд гүйцэтгэж дууссан. Зөвлөх үйлчилгээний баг Хөдөө аж ахуйн ерөнхий хуулийн төслийг Монгол Улсын урт хугацааны хөгжлийн бодлого “Алсын хараа-2025”, Бүсчилсэн хөгжлийн үзэл баримтлал, УИХ-аас баталсан хууль тогтоомж, Засгийн газрын 2024-2028 оны үйл ажиллагааны хөтөлбөр, тэдгээрийн зорилго, зорилт, үзэл баримтлалд нийцүүлэн шинэчлэн боловсруулжээ.
ХХААХҮЯ-ны Төрийн нарийн бичгийн дарга Т.Жамбалцэрэн уг арга хэмжээг нээж хэлсэн үгэндээ, “Хүнс, хөдөө аж ахуй, хөнгөн үйлдвэр салбар хүн амын хэрэгцээ, нийгэм эдийн засгийн суурийг бий болгож, хангадаг гол салбар. Энэ салбарын бодлого шийдвэр үндэсний аюулгүй байдалд шууд нөлөөлдөг. Энэ агуулгаараа тогтвортой байдал маш чухал. Газар тариалан, мал аж ахуй тэргүүтэй салбарын хоорондын уялдааг хангах хэрэгцээ шаардлага бий. ХХААХҮЯ салбар хоорондын уялдаа холбоог хангахын тулд Монгол Улсын хөгжлийн дунд болон урт хугацааны баримт бичгүүдэд үндэслэн дөрвөн асуудалд анхааран ажиллаж байна. Ерөнхийлөгчийн санаачилсан “Цагаан алт”, “Хүнсний хувьсгал”, Ерөнхий сайдын санаачилсан “Атрын IV аян”, УИХ-ын даргын санаачилсан “Шинэ хоршоо-Чинээлэг малчин” хөтөлбөрүүд өөр хоорондоо харилцан уялдаатай хэрэгжиж байна. Нэгийг нь нөгөөгүйгээр төсөөлөх аргагүй. Хүнс, хөдөө аж ахуй, хөнгөн үйлдвэрийн салбарууд нэг нь нөгөөгөө авч явдаг. Цаашдаа үүнийг баталгаажуулахын тулд эрх зүйн орчныг баталгаажуулах ёстой” хэмээн Хөдөө аж ахуйн ерөнхий хуулийн анхдагч бие даасан төслийн ач холбогдлыг цохон тэмдэглэлээ. 
“Монгол орны хөдөөгийн иргэдийн уур амьсгалын өөрчлөлтөд дасан зохицох чадамж болон эрсдэлийн менежментийг боловсронгуй болгох нь” (АДАПТ) төслийн санхүүжилтээр Хөдөө аж ахуйн ерөнхий хуулийн төслийг боловсруулсан зөвлөх үйлчилгээний багийн зүгээс 2024 онд ажлаа гүйцэтгэн ХХААХҮЯ-нд хүлээлгэн өгсөн. Хуулийн төсөл 8 бүлэг 45 зүйлтэй бөгөөд цаашид салбарын эрдэмтэн судлаачид, аж ахуйн нэгжүүд, төрийн болон төрийн бус байгууллагууд зэрэг олон нийтээс санал авах уулзалт хэлэлцүүлгүүдийг зохион байгуулах юм.
