Хүнс, хөдөө аж ахуй, хөнгөн үйлдвэрийн сайд Жадамбын Энхбаяр Нэгдсэн Үндэстний Байгууллагын Хүнс, хөдөө ахуйн байгууллагын БНХАУ, БНАСАУ, Монгол Улсыг түр хамаарагч Винод Ахужаг өнөөдөр /2025.02.21/ хүлээн авч уулзлаа.
Уулзалтын эхэнд ХХААХҮ-ийн сайд Ж.Энхбаяр Нэгдсэн Үндэстний Байгууллагын Хүнс, хөдөө аж ахуйн байгууллага (ХХААБ) үүсгэн байгуулагдсаны 80 жилийн ойн мэнд хүргэн, Монгол Улс ХХААБ-тай 1973 оноос эхлэн өнөөг хүртэл хүнс, хөдөө аж ахуй, хүрээлэн буй орчин, байгаль цаг уур зэрэг олон салбарт хамтран ажиллаж, манай улсын салбарын хөгжилд үнэтэй хувь нэмэр оруулж ирсэнд Монгол Улсын Засгийн газрын нэрийн өмнөөс талархал илэрхийлэв.
АНУ-ын Олон Улсын хөгжлийн агентлагийн санхүүжилтээр НҮБ-ын ХХААБ нь Монгол Улсад дөрвөн улирлын хүлэмжийн загвар төслийг хэрэгжүүлж хоёр хүлэмж ашиглалтад орсон болохыг сайд Ж.Энхбаяр тодотголоо. 
Монгол Улсын Засгийн газар, НҮБ-ын ХХААБ хооронд НҮБ-ын ХХААБ-ын төлөөлөгчийн газрын байгуулах тухай Хүлээн авагч орны гэрээг ойрын хугацаанд Засгийн газрын хуралдаан, Улсын Их Хурлын хаврын чуулганаар хэлэлцүүлэн батлуулахаар ажиллаж байна гэдгийг онцолсон юм.
Суурин төлөөлөгч Винод Ахужа “Шинэ хоршоо-Чинээлэг малчин” хөтөлбөр, “Цагаан алт”, “Хүнсний хувьсгал” хөдөлгөөн, “АТАР-4” аянууд нь эцсийн бүтээгдэхүүн үйлдвэрлэл, боловсруулалтын салбарын хөгжилд анхаарч байгаа томоохон алхам болж байгааг цохон тэмдэглэв. Шинээр хэрэгжиж буй “Цагаан алт” үндэсний хөдөлгөөнийг дэмжиж буйгаа илэрхийлэн, Монгол Улсын хөдөө аж ахуйн салбарт өөрчлөлт, шинэчлэлт авч ирэхийн төлөө үргэлж хамтран ажиллах болно хэмээн мэдэгдлээ.
