Хүнс, хөдөө аж ахуй, хөнгөн үйлдвэрийн яам 2025 оны нэгдүгээр сард сүү боловсруулах үйлдвэр, цехэд 3,721.0 мянган литр сүү бэлтгэн нийлүүлсэн 2018 малчин, эрчимжсэн мал аж ахуй эрхлэгчид 3.7 тэрбум төгрөгийн урамшуулал олголоо.
Хүнсний тухай хууль, Засгийн газрын 2020 оны 130 дугаар тогтоол, 363 дугаар тогтоолын дагуу хүйтний улиралд сүү, сүүн бүтээгдэхүүний нийлүүлэлтийг нэмэгдүүлэх замаар хуурай сүүний импортыг бууруулах, хүн амын сүүний хэрэгцээг тогтвортой, хүртээмжтэй хангах бодлого хэрэгжиж байгаа.
Уг бодлогын хүрээнд жил бүрийн арваннэгдүгээр сарын 1-ний өдрөөс гуравдугаар сарыг дуустал сүү боловсруулах үйлдвэр, цехэд эрүүл ахуйн шаардлагад нийцсэн малын түүхий сүү нийлүүлсэн малчин, эрчимжүүлсэн мал аж ахуй эрхлэгчид мөнгөн урамшуулал олгодог. Энэ нь сүү, сүүн бүтээгдэхүүний үйлдвэрлэл, газар тариалан, эрчимжсэн мал ахуй гэсэн хөдөө аж ахуйн салбаруудыг нэгдсэн бодлогоор дэмжих арга хэмжээ юм. 
