Авлига цэцэглэсэн авто тээврийн “Гүргэр” Гүрсоронзон
2023 оны 12 дугаар сарын 18-ны өдөр. Улс даяараа нүүрсний хулгайчдыг жигшин зэвүүцэж байсан үе. “Нүүрсний хулгай”-н сонсгол болж нүүрс тээврийн автомашины С зөвшөөрлийн асуудал хөндөгдөж, Авто тээврийн үндэсний төвийн дарга Б.Гүрсоронзонг гэрчээр дуудсан ч ирсэнгүй. Түр хорооны дарга, ХЗДХ-ийн сайд Б.Энхбаяр “Сүүлийн долоон жил буюу нүүрсний хулгай, С зөвшөөрөлтэй холбоотой авлига, албан тушаалын үйлдлүүд гарсан жилүүдээс өнөөдрийг хүртэл АТҮТ ТӨҮГ-ын даргаар ажиллаж байгаа Б.Гүрсоронзон нь 2023.12.11-ний өдөр буюу нүүрсний сонсголд гэрчээр дуудагдсанаас хоёр өдрийн дараа гадаадад эмчлүүлж байгаа гэсэн шалтгаан ирүүлсэн байна. Засгийн газрын байгууллагын этгээд УИХ-аас зохион байгуулж байгаа нүүрсний сонсголд дуудагдсан ч санаатайгаар ирээгүй, эс үйлдэл гаргаж байна. УИХ буюу ард түмний төлөөллийн дээд байгууллагад хүндэтгэлгүй хандаж, асуултад хариулах гол этгээд гадагшаа явсан гэдэг тайлбараар хүрэлцэн ирсэнгүй. Тиймээс Түр хорооны даргын хувиар энэ этгээдэд албан тушаалын хариуцлага тооцох асуудлыг Зам тээврийн хөгжлийн сайд болон Засгийн газарт албан ёсоор тавихаа мэдэгдэж байна” гэсэн ч тэр одоо болтол ажлаа хийж байгаа юм. Нүүрсний хэрэгт холбогдох хамгийн өндөр магадлалтай хүн гэгддэг ч тэр өнөөдрийг хүртэл ажлаа хийсээр байгаа нь түүний мэргэжлийн, мундаг гэхээс илүү улс төрийн хамгаалалт маш сайн гэдгийг л харуулж байгаа юм.
Засгийн газраасаа илүү урт удаан настай оршин тогтнож байгаа хүнээр Авто тээврийн үндэсний төвийн захирал Буянтогтохын Гүрсоронзонг нэрлэж болно. Хэнтий аймгийн угшилтай гэдгийг намынхан нь нуулгүй ярьдаг. Ерөнхийлөгч У.Хүрэлсүхийг Ерөнхий сайд байхад томилогдож байсан тэрээр өнөөдрийг хүртэл суудлаа хадгалж үлдсэн цор ганц захирал болж байна. Ерөнхий сайд У.Хүрэлсүх Ерөнхийлөгч болж, Л.Оюун-Эрдэнэ хоёронтоо Ерөнхий сайдаар ажиллаж байхад АТҮТ гэх вант улсаа улам өргөжүүлж байна.
Нүүрс тээврийн С зөвшөөрлийн наймаа түүнээс ч өмнө байсан гэгддэг. Гэхдээ түүнийг захирлаар ажиллаж байх үед нэг машины зөвшөөрөл 20 сая төгрөгт хүрсэн талаар ярьцгаадаг. 2019 оноос хойш АТҮТ гэх зөвшөөрөл дагасан авлигын голомт болсон Авто тээврийн үндэсний төвийн 30 гаруй хүнийг АТГ шалгаж, заримд нь ял оноосон байдаг. Б.Гүрсоронзонгоос бусад нь ял шийтгүүлж, Б.Гүрсоронзонгоос доогуурх албан тушаалтнууд шалгагдаж, Б.Гүрсоронзонгийн хэрэг л уур мэт замхардаг нь анхаарал татаж байгаа юм.
Магадгүй нүүрс тээвэртэй холбогдоогүй улс төрч, хуулийн байгууллагынхан байхгүй хэмээн яригддаг тул тэдний гуйлгыг хар дэвтэртээ хадгалж үлдсэн Б.Гүрсоронзон тэдний хувьд эмзэг цэг нь болж байж магадгүй. Тиймээс Авто тээврийн үндэсний төвийн авлигыг цэгцэлье гэвэл Б.Гүрсоронзонгоос эхлэх нь зүйд нийцэх юм. Б.Энхбаяр гишүүн нүүрсний сонсголоор түүнд үг дайсан ч сайд нь, Засгийн газар нь түүнийг хамгаалж үлдсэн хэвээр байна.
Үргэлжлэл бий…
Хамгийн чухал мэдээг цаг тухайд нь авч байгаарай
