Мэргэжлийн сүмогийн Харү башёгийн банзүкэ буюу чансааг өнөөдөр/2025.02.25/ албан ёсоор танилцуулжээ. Осака хотноо гуравдугаар сарын 9-ний өдөр эхлэх башёд Хошорюү С.Бямбасүрэн анх удаагаа ёкозүна цолтойгоо зодоглох болно. Өдгөө 25 настай тэрбээр Хацү башёд түрүүлсэн амжилтаараа ёкозүна цолны болзол хангасан билээ.
Өнөөдөр болсон хэвлэлийн бага хурлын үеэр Хошорюү С.Бямбасүрэн “Би эцэст нь зорьж байсан зорилгодоо хүрч, аварга боллоо. Баяртай байна. Гэхдээ үүнийгээ дагаад асар их үүрэг хариуцлага ирж байна. Бага зэрэг эмээж байна” гэв.
Мэргэжлийн сүмогийн 68 дахь ёкозүна Асашорюү Д.Дагвадоржийн үеэл дүү Хошорюү С.Бямбасүрэн энэ оны эхний башёд тун сайн барилдаж, хоёр ч нэмэлт барилдааны эцэст түрүүлсэн. Үүнээс гадна өмнөх ёкозүна Тэрүнофүжи Г.Ган-Эрдэнийн бэртэл гэмтэл сэдэрч, үргэлжлүүлэн барилдах боломжгүй болсон учир зодог тайлахаас өөр аргагүйд хүрсэн нь харамсалтай. 
Ирэх Хацү башёд дээд зиндаанд дэвшин барилдах бөхчүүдээс украин залуу Аонишики олны анхаарлыг татаж байна. Өдгөө 20 настай тэрбээр маэгаширагийн 15 дугаарт эрэмблэгджээ. Дайнаас дүрвэж 2022 оны дөрөвдүгээр сард Японд ирсэн залуу хүү сүмогоор идэвхтэй хичээллэн ердөө башёгийн дараа дээд зиндаанд дэвшсэн гэнэ. Энэхүү амжилт нь 1958 оноос хойш гараагүй байжээ.
Ирэх башёд дээд макүүчи зиндаанд нийт зургаан монгол бөх барилдана. Та бүхэнд танилцуулбал,
- Ёкозүна Хошорюү С.Бямбасүрэн
- Комүсүби Киришима Б.Лхагвасүрэн
- Чиёошома Г.Мөнхсайхан
- Тамаваши Б.Мөнх-Оргил
- Ошома П.Дэлгэрбаяр
- Онокацү Б.Чойжилсүрэн
Харин Тамашохо Э.Энхманлай эргэн зиндаа буурч, жүрёод Миторюү Б.Төрболдын хамтаар барилдахаар болжээ.
Нийт Монголын 20 бөх мэргэжлийн сүмогийн таван зиндаанд барилдана. Сонирхолтой нэрс дундаас дурдвал, дархан аварга Г.Өсөхбаярын хүү Сэйхакүхо Ө.Дэмиджамц макүшитад, Асашорюүгийн өөр нэгэн үеэл дүү болох ах Д.Сэржбүдээгийн хүү нь болох Тэнросэй С.Лувсангомбо жонокүчид тус тус барилдана. Мөн улсын гарьд Д.Рагчаагийн хүү Асахакүрюү Р.Жамъянтогтох макүшитад хүч үзнэ.
