MCS группийн Захирлуудын зөвлөлийн дарга Ж.Оджаргал сүүлийн үед өрнөөд буй үйл явдалд өөрийн байр суурийг илэрхийллээ.
Тус группийн нийт ажилчдын дотоод цахим бүлгэмд Ж.Оджаргалын ярьж буй бичлэгийг байршуулсан юм байна. Ж.Оджаргалаас “Та байр сууриа хэлээч. Бид их удаан чимээгүй явлаа. Сүүлдээ дуугүй байх нь буруу гэж бодох боллоо” хэмээн асуужээ.
Харин Ж.Оджаргал “Бид урдах ажлаа л хийгээд явдаг хүмүүс. Сүүлийн үед манай компанийг харлуулах гэж бүлэг хүмүүс зохион байгуулалттай хар пи ар хийлээ л дээ. 
Бид нар нийгмийг талцуулж, бужигнуулахаас хол байя гэж хүлцэнгүй гэх үү харзнаж байна. Тэгэх тусам буруутай ч юм шиг ойлголт өгөөд байх бололтой. Харамсаж байгаа. Юм бүрд хариулт өгөөд явах сонирхол байхгүй, чаддаг ч үгүй. Гэхдээ үнэн мөнийг ялгаж салгах хүмүүс байгаа гэдэгт найдаж байна. Үүнд найдаж хэтэрхий хүлцэнгүй байсан байх.
Ухаа худаг гэхэд л 15, 16 жилийн өмнө том ажлын хэсэг гарч, дөрвөн сар ажилласан, Стратегийн ордын хуулийн дагуу явагдсан үйл явц шүү дээ. Бид ямар ч хууль дүрэм зөрчөөгүй. Одоогийн үйл ажиллагаа явуулж буй ЭТТ бол бидний төрдөө өгсөн лиценз буюу нийт ордын 96 хувь нь шүү дээ. Хууль журмын дагуу учраас үүн дээр санаа зовохгүй байна. Сонгуульд өгсөн хандивыг ч ярьж байна гэсэн. Жагсаал зохион байгуулдаг, троллын армитай гэсэн. Огт хийгээгүй юмыг хийсэн гэж ярихаар гайхаж байна.
Гашуунсухайт-Ганцмод боомтын хил холболтын хэлэлцээрийг хүртэл бид эсэргүүцэж байна гэсэн. Хүмүүс мэдэж байгаа. Төмөр зам ашиглалтад ороосой л гэж хүсэж байгаа шүү дээ. ЗГ-ын энэ ажил маш чухал. Ер нь Засгийн газар тогтвортой байж байж хөрөнгө оруулалт татна шүү дээ. Бид АНУ-д байнга ажиллаж байгаа. Хойд Америкаас хөрөнгө оруулалт татахаар төвлөрөн ажиллаж байна. Ухаа худгийн толгой компани олон улсын хөрөнгийн бирж дээр байгаа. Манай MCS-ийн бараг 60-аад хувьд нь дандаа томоохон гадаадын хөрөнгө оруулагчид бий. Олон улсын зах зээл дээр мөнгө босгож байж энэ том бүтээн байгуулалтуудыг хийнэ. Энэ бүгдийг харлуулах гэсэн үйлдэлд итгэх хэрэггүй. Битгий санаа зовоорой гэж хэлье” гэжээ.
Г.САНСАРМАА
