Монголын уламжлалт шашин, соёл, мэдлэг ухааныг дэлгэрүүлэх, харилцан туршлага солилцох, нийгмийн сайн сайхны төлөө хүнлэг энэрэнгүй, ёс суртахуунтай иргэнийг төлөвшүүлэх, улс орныхоо онцлог давуу талыг шингээсэн сургалт, судалгаа, үйлдвэрлэлийн технологийг дэлхийн бусад улс орнуудад таниулан сурталчлах зорилгоор Монгол Улсын Их Сургууль, Монголын Бурханы Шашинтны Төв Гандантэгчэнлин хийдтэй хамтын ажиллагааны санамж бичиг байгууллаа.
Санамж бичгийн хүрээнд хоёр байгууллага “Шашин судлал”, “Сэтгэл судлал”, “Утга зохиол,урлаг судлал”, “Монгол хэл, хэл шинжлэл”, “Философи”, “Уламжлалт анагаах ухаан” болон бусад чиглэлээр багшлах боловсон хүчний нөөцийг бэлтгэх, чадавхжуулах, Багш, судлаач, оюутнуудын эрдэм шинжилгээ, судалгааны хамтын ажиллагааг дэмжих, Номын сангаа хамтран ашиглах зэрэг сургалт, эрдэм шинжилгээний чиглэлээр хамтран ажиллах юм.
Санамж бичигт гарын үсэг зурах ёслолын үеэр Монголын Бурханы Шашинтны Төв Гандантэгчэнлин хийдийн Тэргүүн их хамба лам, хамба номун хан, гэвш лхаарамба Д.Жавзандорж “Монгол хүний оюуны чадамж, өвөг дээдэс маань хойч үе, бидний төлөө зориулсан хөдөлмөрийг олон хүнд хүргэх, энэ цаг үеийн гүүр болох хувь, хариуцлага бидэнд оногдсон. Үүнийг нэр төртэйгээр хийх боломж бидэнд байна” хэмээгээд цаашид олон чиглэлээр хамтран ажиллахад нээлттэй байгаагаа онцлов. 
МУИС-ийн ректор, профессор Б.Очирхуяг “Өнөөдөр бид хамтын ажиллагаагаа албажуулж байна. Албажуулж гэж хэлж байгаагийн учир нь манай 2 байгууллагын хамтын ажиллагаа одоо эхэлж байгаа биш, олон жилийн түүхтэй. Анх 1957 онд МУИС-д Төвөд хэлний анги нээхэд тухайн үеийн Гандантэгчэнлин хийдийн лам, хуврагууд хичээл зааж байсан түүхтэй юм. Түүнээс хойш судалгаа шинжилгээ зэрэг олон зүйл дээр өргөн хүрээнд хамтран ажиллаж байсан арвин туршлага бидэнд байна. Өнөөдөр байгуулж байгаа энэхүү санамж бичиг бидний хамтын ажиллагааг дараачийн шинэ шатанд гаргах, өргөжүүлэх зорилготой”-г тэмдэглэн улсаараа овоглодог цорын ганц сургуулийн хувьд хэд хэдэн зүйлийг үүрэг, зорилго болгож буйн нэг нь Монгол судлал байдаг. Түүнчлэн нийгэмд үйлчлэх, нийгмийг соён гэгээрүүлэх чиг үүргийг ч манай эрдмийн хамт олон гүйцэтгэдэг юм. Тиймээс энэ чиглэлд хамтран ажиллахад манай хоёр байгууллагын хамтын ажиллагаа нийцэж байна гээд Монголын Бурханы Шашинтны Төв Гандантэгчэнлин хийдийн Тэргүүн их хамба лам, хамба номун хан, гэвш лхаарамба Д.Жавзандоржийг МУИС-д зочлохыг урилаа.
Хамтын ажиллагааны санамж бичигт гарын үсэг зурах ёслолд МБШТ Гандантэгчэнлин хийдийн талаас тэргүүн их хамба лам, хамба номун хан, гэвш, лхаарамба, доктор Д.Жавзандорж, дэд хамба С.Гантөмөр, тамгын лам Э.Баяр, да лам Н.Бямбажав, Гадаад харилцаа хариуцсан тэргүүлэгч М.Ганхуяг, Ёслол хүндэтгэлийн хариуцсан ажилтан Д.Пүрэвсайхан нар оролцов. Харин МУИС-ийн талаас ректор Б.Очирхуяг, МУИС-ийн УЗ-ийн гишүүн, МУИС-ийн Төгсөгчдийн нэгдсэн холбооны гүйцэтгэх захирал Б.Батсайхан, Судалгаа, хамтын ажиллагаа эрхэлсэн проректор С.Гомбобаатар, Хөрөнгө оруулалтын газрын дарга Д.Бадмаанямбуу, Хамтын ажиллагааны мэргэжилтэн Г.Наргил нар оролцлоо.
